Saturday, June 8, 2013

என் வீட்டுத் தோட்டத்தில்

இன்று மேலும் ஒரு புது வகை மலர்.

இது ரோடடெண்ட்ரோன் (Rhododendron) என அழைக்கப்படுவது. இப்பெயர் பழங்கால க்ரேக்க மொழிச் சொல்.


இந்த வகைச் செடியில் 1000க்கும் மேற்பட்ட வகைகள் உண்டென்று விக்கியில் தகவல் உள்ளது. பல வர்ணங்களில் இவை ஐரோப்பாவின் பல நகரங்களில் காணக்கிடைக்கும் ஒரு செடி. வெயில் அதிகம் இருக்கும் கிழக்கு தெற்கு ஐரோப்பிய நாடுகளிலும் கெனரி தீவுகளிலும் இதனை 2 அடி உயரத்திற்கும் மேற்பட்ட வடிவில் காணலாம். என் வீட்டில் இருக்கும் வகை 1 அடி உயரம் மட்டுமே உள்ளது.


மொட்டும் மலர்ந்த பூங்கொத்துமாக

இந்தச் செடி ஏறக்குறைய 6 வருடங்களாக என் தோட்டத்தில் உள்ளது. வருடத்தில் ஒரே ஒரு முறை மட்டுமே பூக்கும். ஏப்ரல் இறுதி அல்லது மே ஆரம்பத்தில் பூக்கின்ற மலர்கள் ஜூன் மாதம் பாதி வரை இருக்கும் பின்னர் செடி மட்டும் இலைகளுடன் காட்சியளிக்கும். செடி முழுதும் மலர் வணம் போல காட்சி தரும்.


பூத்திருப்பவை அனைத்துமே ஒரே செடியில் பூத்தவை தாம்

சுபா

Sunday, June 2, 2013

என் சரித்திரம் - உ.வே.சா வுடன் ஒரு உலா - 52

பொதுவாகவே சமய நிறுவனங்களில் காலை தொடங்கி மாலை வரை நடைபெறும் நிகழ்வுகள் அனைத்தும் திட்டமிட்டபடியும் நிகழ்வுகளின் வரிசையில் ஒழுங்கு குறையாமலும் நடைபெறும் . ஹிந்து சமயம் சார்ந்த நிறுவனங்களில் மட்டும் நடைபெறுகின்ற ஒரு விஷயம் அல்ல இது. வாட்டிக்கனில் நடைபெறும் சடங்குகளாகட்டும், ஆர்த்தடோக்ஸ் மடாலயமாகட்டும் அல்லது எந்த சமய குருமார்கள் இருந்து சமயம் வளர்க்கும்  இடமாக இருக்கட்டும்.. அங்கே ஒரு நாள் முழுதும் நடைபெறும் விஷயங்கள் என்பவை எப்போதும் நேரத்திற்கு ஏற்ப ஒரு ஒழுங்குடன் நடைபெற்றுக் கொடிருப்பதைக் காண முடியும்.

எனது அனுபவத்தில் சில நாட்கள் பேரூர் சைவ மடத்தில் தங்கியிருந்திருக்கின்றேன். அதிகாலை தொடங்கி இரவு வரை மடாதிபதியும் அவரைச் சார்ந்தவர்களும்  கலந்து கொள்ளும் விஷயங்கள் அதிகாலை பூஜை அதற்குத் தொடர்பான சடங்குகள், பிற அன்றாட நடவடிக்கைகள் என பல விஷயங்கள் குறிப்பிட்ட நேரத்தில் நடைபெற்றுக் கொண்டிருக்கும்.  எனது தமிழக பயணங்களின் அனுபவத்தில்  தருமபுர ஆதீனம், கோவிலூர் மடம், குன்றக்குடி சைவ மடம், திருவாவடுதுறை சைவ மடம் என இவ்வகையான சில இடங்களுக்குச் செல்லும் வாய்ப்பு அமையும் போதெல்லாம் ஒரு குறிப்பிட்ட நேரம் மடாதிபதிகள் பார்வையாளர்களுக்கு ஒதுக்குவது என்பதையும் அறிந்திருக்கின்றேன். இப்படி ஒவ்வொரு விஷயங்களுக்கும் குறிப்பிட்ட நேரத்தை நிர்ணயித்து  அதற்கேற்றார்போல் அன்றாட விஷயங்களைக் கவனிப்பது இச்சமய நிறுவனத்தை ஒழுங்குடன் நடத்திச் செல்ல உதவுகின்றது.

திருவாவடுதுறை மடத்தின் சிறப்புக்கள் என பல விஷயங்கள் இருக்கின்றன. அதில் ஒரு குறிப்பிடத்தக்க சிறப்பு அம்சமாக ஒரு விஷயத்தைக் கூறலாம். அதாவது, சைவ மடங்கள் ஒழுக வேண்டிய அன்றாட நடைமுறை கடமைகள் பற்றிய விஷயங்களை வரையறுத்து அதனை மடங்களுக்குள்ளே பயன்படுத்த வேண்டிய சட்டமாக்கி அறிமுகப்படுத்திய சிறப்பு இந்த மடத்திற்கு உரியதாகின்றது. இதனைப் பற்றி பின்னர் ஒருமுறை இதே தொடரில் விளக்க முயற்சிக்கின்றேன்.

குருபூஜை நிகழ்வு மட்டுமல்ல. திருவாவடுதுறை மடத்தின் சம்பிரதாயங்கள், ஆதீனகர்த்தரின் அன்றாட நடவடிக்கைகள் என பல முக்கிய விஷயங்களைப் பதிந்து வைத்துள்ள ஒரு ஆவணமாகவும் கூட  என் சரித்திரம் நூல் விளங்குகின்றது. மடத்தின் அன்றாட நிகழ்வுகளின் தன்மையில் தற்காலத்தில் சில மாற்றங்கள் காலத்தின் தேவைக்கேற்ப நடந்திருக்கலாம். ஆனால் இன்றைக்கு 180 ஆண்டுகளுக்கு முன்னர் திருவாவடுதுறை மடத்தில் ஒவ்வொரு நாளும் நிகழ்ந்த  அன்றாட நிகழ்வுகளைப் படம் பிடித்தார் போலக் காட்டும்  சில பகுதிகள்  வழி திருமடத்தின் அன்றாட விஷயங்களை அறிந்து கொள்ள வாசகர்களுக்கு இந்த நூல் உதவுகின்றது என்பதில் சந்தேகமில்லை.

அச்சமயத்தில் ஆதீனகர்த்தராக இருந்தவர் ஸ்ரீலஸ்ரீ சுப்பிரமணிய தேசிகர் அவர்கள். இவரது பொழுது போக்கு என்பதே நூல்களை வைத்துக் கொண்டு பாடம் சொல்வது தானாம். காலை முதல் இரவு தூங்கச் செல்லும் வரை  பெரும்பாலும் தம்பிரான்களுக்கும் பாடம் கேட்க வருவோருக்கும் பாடம் சொல்வதிலேயே இவரது பொழுதுகள் செல்லுமாம்.

சுப்பிரமணிய தேசிகரது  அன்றாட செயல்பாடுகள் என்பவை ஒரு வழக்கமான சம்பிரதாயமாக இருந்து வந்திருக்கின்றது. அதிகாலை ஐந்து மணிக்கு முன்னரே  எழுந்து விடுவாராம். மடத்திலிருந்து ஏறக்குறைய அரை மைல் தூரத்திலிருக்கும் காவிரிக்கரைக்கு நடந்தேதான் செல்வாராம். இவர் செல்லும் போது இவருடன் தவசிப் பிள்ளைகள் உதவியாக ஆசனப் பலகை, மடி வஸ்திரப் பெட்டி, மற்றும் தேவையான பொருட்களுடன் செல்வார்களாம். காவிரிக்கரைக்குச் சென்று வரும் வழிப்பாதயில் மருத மரங்கள் இரு பகுதிகளிலும் நிறைந்திருக்குமாம். அச்சாலையில் தேசிகர் ஸ்நானம் செய்து முடித்து வரும் போது அவர் உடன் பேசிக் கொண்டு வருவதற்காகவே சிலர் சாலைகளில் காத்திருப்பராம்.

வரும் வழியிலேயே சமாதித் தோப்பு உள்ளது. இங்கு மடத்தின் முன்னாளையை தலைவர்களாக இருந்தவர்களின் சமாதிக் கோயில்கள் உள்ளன. இவற்றை நான் திருவாவடுதுறை மடம் சென்ற போது நேரில் சென்று பார்த்தேன். சமாதிக் கோயில்களில் வழிபட்டு விட்டு மாசிலாமணீஸ்வரர்  ஆலயம் வந்து சுவாமி தரிசனம் முடித்து பின்னர் மடத்திற்குச் செல்வாராம். இப்படிச் செல்கையில் ஆலயத்தின் கிழக்குப் பகுதியில் உள்ள துணைவந்த விநாயகருக் குசம்பிரதாயமாக சிதர் தேங்காய் உடைப்பார்களாம். இக்காட்சியை  இக்குறிப்புக்களைக் கொண்டு உருவகம் செய்து பார்க்கும் போது இதுவே ஒரு சிறிய விழா போலத் தோன்றுகின்றது. காலை  வேளையிலேயே உடலுக்கு ஆரோக்கியம் தரும் வகையில் நடைப்பழக்கமும் தேசிகருக்கு அமைந்திருந்தது என்பதையும்  இக்குறிப்புக்களால் அறிய முடிகின்றது.

இந்தச் சடங்குகள் முடிந்து மடத்திற்கு வந்ததும் முதலில் திருமாளிகைத்தேவர் தரிசனம், பின்னர் ஓதுவார்கள் குருமுதல்வர் நமச்சிவாய மூர்த்தி சுவாமிகள் அருளிய ஸ்ரீ பஞ்சாட்சர தேசிகர் மாலையிலிருந்து பத்துப் பாடல்களை ஓத ஸ்ரீ நமச்சிவாய மூர்த்தி சுவாமிகள் சன்னிதியில் தரிசனமும்  நடைபெறுமாம். ஒவ்வொரு பாடல்கள் சொல்லி முடிந்ததும் தேசிகர் சாஷ்டாங்கமாக விழுந்து வணங்குவாராம், இப்படி பத்து பாடல்களுக்கும் 10 முறை என இச்சடங்கு நடைபெறுமாம். இதன் பின்னர் மடத்திலிருப்போர் அனைவருக்கும் தேசிகரே விபூதி வழங்கிவிட்டு தனது ஆசனமான ஒடுக்கத்திற்கு வந்து அமர்வாராம். இப்படி அவர் வந்து அமரும் போது காலை மணி எட்டாகிவிடும் என்ற குறிப்பையும் காண முடிகின்றது.

ஒடுக்கத்தில் வந்து அமர்ந்ததும் வந்திருக்கும் யாசகர்களுக்கு சன்மானம் அளித்து அனுப்பி வைப்பதும் தேசிகருக்கு ஒரு கடமையாக இருந்திருக்கின்றது. அன்றைய பொழுதில் யாரேனும் யாசித்து வரவில்லையென்றால் சற்று வருத்தமும் அவருக்கு ஏற்படுமாம். இவர் காலையில் உணவு உட்கொள்வதுமில்லை. யாசகர்களை அனுப்பி விட்ட பிறகு பாடம் சொல்லுதலை ஆரம்பித்து விடுவார்களாம்.

இடையில் பாடம் நடந்து கொண்டிருக்கும் போதே யாரேனும் வித்துவான்கள் தேசிகரைப் பார்க்க வந்திருந்தால் அவர்களைத் தேசிகரைச் சந்திக்க அனுமதித்து வந்திருந்தவர் எந்த  விஷயத்தில் வல்லமை உள்ளவரோ அந்த விஷயத்தைப்பற்றி பேசச்சொல்லியோ, பாடச் சொல்லியோ கேட்டு தானும் சம்பாஷித்து மகிழ்வாராம் தேசிகர்.அப்படி வருபவர்கள் கலை ஞானமோ கல்வி ஞானமோ உள்ளவர்களாக இருந்தால் மடத்திலேயே  சில காலங்கள் தங்கியிருந்து செல்ல வேண்டும் என்ற அன்பு வேண்டுகோளையும் மனமாரச் சொல்வாரம். இப்படிப் பல வித்துவான்களைப் பாராட்டி ஆதரித்து கலையும், இலக்கியமும், சைவமும், தமிழும் வளர சுப்பிரமணிய தேசிகர் ஆதரவளித்திருக்கின்றார் என்ற விஷயங்களை என் சரித்திரம் வழியாக அறிந்து கொள்ள முடிகின்றது. இத்தகைய புரவலர்கள் பலரது ஆதரவினால் பல கல்வி மான்கள் உருவாகும் நிலையும், கல்வியும் ஞானமும் நிலைத்து செழித்தும் வளரும் நிலையும் அமைந்திருந்தது என்பதையும் கூட நன்கு உணர முடிகின்றது.


ஸ்ரீலஸ்ரீ சுப்பிரமணிய தேசிகர்

தொடரும்...

சுபா

என் வீட்டுத் தோட்டத்தில்

டூலிப் சீஸன் இங்கே முடிந்து விட்டது. இந்த முறை சில வித்தியாசமான வகைகளையும் நட்டு வைத்து பரிசோதித்தேன் என்று முன்னர் குறிப்பிட்ட்டிருந்தேன். அதில் ஒரு வகையை இன்று  படத்தில் காணலாம்.



டூலிப் ம லர்கள் எப்போதும் காணும் வடிவத்திலிருந்து மாறுபடும் ஒரு வடிவம் இதற்கு. சிவப்பு, பச்சை, மஞ்சள், வெள்ளை என நான்கு வர்ணங்கள் கலந்து கண்களுக்கு மாறுபட்ட அழகை காட்டும் மலர் வகை இது.

சுபா

Robert Langdon is back..! -2

Inferno நூலை சிலர் வாங்கி வாசிக்க ஆரம்பித்திருக்கலாம். நூல் விமர்சனம் செய்ய இப்போது நான் விரும்பவில்லை. ஆனால் சில விஷயங்களை அவ்வப்போது பகிர்ந்து கொள்வதும் வாசிப்பவர்களுக்கும் வாசிக்க நினைத்திருப்பவர்களுக்கும் உதவலாம்.

Dante Aligheri ஐ எப்படி இவரது துப்பறியும் பணிக்கு பயன்படுத்திக் கொண்டார் என ஆர்வம் தொடக்கம் முதல் இருந்தது. ஆரம்பத்திலேயே தொடர்பினை விளக்க ஆரம்பித்து விடுகின்றார். Dante Aligheriயின்   Divine Comedy நூலை இந்த நூல வாசிப்பதற்கு முன்னர் வாசித்திருப்பது அதிகம் சுவை கூட்டலாம். நான் வாசிக்க வில்லை. இனி தான் தேடவேண்டும். ஆனாலும் பிரச்சனையில்லை. தேவையான விஷயங்களை டான் ப்ரவுன் இந்த நூலிலும் கொடுத்து  விடுகின்றார்.



நூல் முழுக்க ரெனைசான்ஸ் கலைஞர்கள், அவர்தம் கலைப்படைப்புக்கள் பேசப்படுகின்றன. இதனைப்  படித்து விட்டு மீண்டும் ப்ளோரன்ஸ் போக வேண்டியது அவசியம். தனித்தனியாக போர்ட்டிசெல்லி, மைக்கல் ஆஞ்செலோ, வசாரி கலைப்படைப்புக்களை நுணுக்கமாக பார்த்து வாசிக்க வேண்டும்.

அவ்வப்போது என் தேடுதலுக்காக இன்னூலில் குறிப்பிடப்படும் கலைப்படைப்புக்களை ஓவியங்களை தேடிப்பார்க்கும் போது இங்கே அவற்றை பகிர்ந்து கொள்கின்றேன். என் காமெராவில் நான் நேராகச் சென்றிருந்த போது பதிந்தவையும் இருக்கின்றன. அப்போது அழகுக்காகவும் ப்ரமாண்டத்திற்காகவும் புகைப்படமாக பதிந்து வைத்தேன். இப்போது Inferno  படிக்கும் போது அதன் உள்ளே பதிந்திருக்கும் விஷயங்களையும் ஓரளவு அறிந்து கொள்ளும் போது புதிய பார்வை கிட்டுகின்றது.

சுவர்க்கத்திற்கு செல்வதற்கு முன்னர் நரகத்தின் பல படிகளைத் தாண்டிச் செல்ல வேண்டும்... :-)

சரி.. நூலை வாசித்ததில்... Divine Comedy  நூலில் உள்ள ஒரு பகுதி வருகின்றது.. எனக்குப் பிடித்திருந்தது. படித்து விட்டு சிரிக்காமல் இருக்க முடியவில்லை. அதனால் பகிர்ந்து கொள்கிறேன்.
The darkest places in hell
are reserved for those
who maintain their neutrality
in times of moral crisis.

:-))))

சுபா

எனக்கு ப் பொதுவாகவே கவிதையைப் புரிந்து கொள்வதில் சிரமம் உண்டு திரு.இன்னம்பூரான். ஆனாலும் இந்த நூலைத் தேட வேண்டும் என்று நினைத்திருந்தேன். காலையில் தேடியதில்  நூலின்  ஆங்கில வடிவம் pdf வடிவத்தில் கிடைத்தது.    http://www2.hn.psu.edu/faculty/jmanis/dante/dante-longfellow.pdf
தேவைப்படுபவர்கள் தரவிறக்கிக் கொள்ளலாம்.

சுபா

The Divine Comedy  http://justcheckingonall.wordpress.com/2008/02/28/complete-dante-alighieris-divine-comedy-in-pdf-3-books/ இங்கே மூன்று தனி பிடிஎப் நூல்களாக படங்களுடன் இருக்கின்றது. 

சுபா

Thursday, May 30, 2013

என் சரித்திரம் - உ.வே.சா வுடன் ஒரு உலா - 51

ஒரு நூல் உருவாக்கம் பெற்று முழுமை அடைவது என்பது ஒரு ஆபூர்வமான விஷயம் தான். இது எப்படி அபூர்வமான ஒன்றாகலாம் என சிலர் நினைக்கலாம்.  பலருக்கும்    திடீரென்று ஒரு மாயஜாலத்தைச் செய்வதும் அதனால் கண்களுக்கு ஒரு வித்தியாசத்தைக் காட்டி மறைப்பதும் அபூர்வமான விஷயங்களாகப் படலாம். எனக்கு பொதுவாகவே இப்படிப்பட்ட விஷயங்கள் அபூர்வம் என்ற வரையறைக்குள் சென்று சேர்வதில்லை. ஒரு கருத்து உதிக்க, அது சிந்தனைக்குள்ளே ஒரு வடிவம் பெற்று பின்னர் இடையில் ஒலியாக உருவம் கொண்டு பின்னர் எழுத்தாக வடிவம் பெற்று முழுமை பெற்று சீரான கருத்துக்குவியலாக வந்து சேர்ந்து முழுமை பெறுவது ஒரு அபூர்வமான விஷயம் அல்லவா?

கடந்த வார இறுதியில்தமிழ் மரபு அறக்கட்டளையின் வெளியீடாக மீனாட்சி சுந்தரம் பிள்ளையவர்களின் திரு அம்பர் புராணத்தை வெளியிட்டிருந்தேன். திருவாவடுதுறை மடத்தில் நேரில் சென்று தமிழ் மரபு அறக்கட்டளையின் மின்னாக்கப் பணியினால் பொது மக்கள் வாசித்துப் பயன்பெறும் வண்ணம் பிள்ளையவர்களின் நூல்களை மின்பதிப்பாக்கம் செய்து வைக்க அவர்களின் ஒத்துழைப்பை நாடிய போது மடத்தின் நிர்வாகத்தினர்  சம்மதம் கொடுத்தனர். அவர்களின் ஒத்துழைப்பினால் மடத்தின் நூலகத்தின் புராண நூல்களில் தேடி அவற்றை எடுத்து நூலின் ஒவ்வொரு பக்கங்களையும் மின்பதிப்பு செய்தோம்.

அதில் குறிப்பிடத்தக்க ஒரு நூல் இந்தத் திரு அம்பர்புராணம். நான் என்னிடம் ஏற்கனவே தயார் செய்து வைத்திருந்த பட்டியலில் திருஅம்பர்புராண நூலின் பெயரையும் குறித்து வைத்திருந்தேன். மண்டபத்தின் தலபுராண அல்லது புராண நூல்களின் பட்டியலில் இருக்கும் ஏறக்குறைய இரண்டாயிரம் நூல்களின் பெயர்களில் திருஅம்பர்புராணத்தின் பெயரை கண்டுபிடித்து அது இருக்கும் அலமாரி எண்ணைச் சென்று பார்த்து தேடினால் வரிசையில் புத்தகங்கள் வைக்கப்பட்டிருக்கவில்லை. ஆனாலும் கையில் வைத்துக் கொண்டிருந்த டார்ச் லைட்டைக் கொண்டே தேடுதல் பணியைச் செய்தோம். முதல் நாள் நூல் கிடைக்கவில்லை. மறுநாள் சென்ற போது மின்சாரமும் இருந்ததால் திருஅம்பர்ப்புராணத்தோடு மேலும் இரண்டு நூல்களும் கூட கிடைத்தன.

இந்தத் திரு அம்பர்ப்புராணத்தை நான் தேடியதற்குக் காரணம் ஏற்கனவே நான் என் சரித்திரம் நூலில் இந்த நூலைப் பற்றி வாசித்திருந்தமையால் தான்.ஒரு வரலாற்று விஷயம் சுவாரசியமாகப் பதிவாக்கப்பட்டிருக்கும் போது அதனை மேலும் அருகில் சென்று அறிந்து கொள்ள மனம் மிகுந்த ஈடுபாடு காட்டுகின்றது. அந்த உந்துதலில் இந்த நூலை திருமடத்திலேயே பார்த்து விட வாய்ப்பமைந்தால் எவ்வளவு  சிறப்பாக இருக்கும் என நினைத்துச் சென்றது வீண் போகவில்லை. அத்தியாயம் 45லும் 46லும் திருஅம்பர்புராணத்தைப் பற்றிய குறிப்புக்கள் வருகின்றன. அதனை மீண்டும் வாசித்து இப்பதிவில் இணைப்பதும் இந்த நூலைப் பற்றிய மேலதிக விபரத்தை அறிந்து கொள்ள விரும்புபவர்களுக்கு உதவலாம்.

திருஅம்பர்புராணம் உ.வே.சா அவர்கள் மீனாட்சி சுந்தரம் பிள்ளையவர்களிடம் மாணவராக இருந்த போது எழுதி முற்றுப் படுத்தப்பட்ட ஒரு நூல். ஏற்கனவே தொடங்கி செய்யுள்களை எழுதியிருந்தார். ஆனாலும் நூல் முற்றுப் பெறவில்லை. திருவாவடுதுறையிலும் திருமடத்திலும் தான்  இந்த நூல் முழுமை அடைந்தது. இது முழுமை பெற்ற விதத்தை என் சரித்திரத்தின் குறிப்பிலிருந்தே  வாசிப்போமே.

" ஒரு நாள் ஆசிரியர் தம் புஸ்தகக் கட்டில் உள்ள ஒர் ஏட்டுச் சுவடியை எடுத்து வரச் சொன்னார். அவர் முன்னமே பாடத் தொடங்கி ஓரளவு எழுதப்பெற்று முற்றுப் பெறாதிருந்த அம்பர்ப் புராண ஏட்டுச் சுவடி அது; ‘திருவம்பர்’ என்னும் தேவாரம் பெற்ற சிவஸ்தல வரலாற்றைச் சொல்லுவது. அதை முதலிலிருந்து என்னைப் படித்து வரும்படி சொன்னார். நான் மெல்லப் படித்தேன். அவ்வப்போது சில திருத்தங்களை அவர் சொல்ல அவற்றை நான் சுவடியிற் பதிந்தேன். இரண்டு மூன்று தினங்களில் அதில் உள்ள பாடல்கள் முழுவதையும் படித்துத் திருத்தங்களும் செய்தேன். “இந்த நூலை ஆரம்பித்து ஒரு வருஷமாகிறது. அடிக்கடி இடையூறு ஏற்படுகிறது. இதை முன்பு நான் சொல்லச் சொல்ல ஒருவர் எழுதினார். அவர் திருத்தமாக எழுதக் கூடியவரல்லர். நான் ஏதாவது சொன்னால் அதைக் காதில் வாங்கிக் கொள்ளாமல் சில இடங்களில் வேறாக எழுதியிருக்கிறார். இப்படி இவர்
செய்திருப்பாரென்று சந்தேகப்பட்டுத்தான் மறுபடியும் படிக்கச் சொன்னேன். சொல்வதைச் சரியாக எழுதுவோர் கிடைப்பது அருமையாக இருக்கிறது” என்று சொல்லிவிட்டு, “இனி இந்தப் புராணத்தை விரைவில் முடித்துவிடவேண்டும். நீர் ஏட்டில் எழுதலாமல்லவா?” என்று என்னை ஆசிரியர் கேட்டார்."

இதனைச் செய்யக் காத்திருக்கின்றேன் என்றுகூறிய உ.வே.சாவிடம் விரைவில் திருவாவடுதுறை சென்று அங்கே காத்திருக்கும் தம்பிரான்களுக்குப் பாடம் சொல்லும் போது இந்த நூலை முடித்து விடலாம் என்று பிள்ளையவர்கள்  கூறிவிட்டார்கள். இதில் உ.வே.சாவுக்கு மனம் நிறைந்த மகிழ்ச்சி.

புறப்பட்டு  மாயூரம் எல்லையைத் தாண்டிமாட்டு வண்டியில் திருவாவடுதுறை சென்று கொண்டிருக்கும் போது பிள்ளையவர்களுக்கு ஏதோ சிந்தனை. அருகில் சவேரிநாதப் பிள்ளையும் உ.வே.சாவும் இருக்கின்றனர்.

" “அம்பர்ப் புராணச் சுவடியை எடும்” என்று ஆசிரியர் கூறவே நான் அதனை எடுத்துப் பிரித்தேன். “எழுத்தாணியை எடுத்துக் கொள்ளும்” என்று அவர் சொன்னார். நான், “முன்னமே முழுவதையும் வாசித்துக் காட்டித் திருத்தங்களைப் பதிந்தோமே” என்று எண்ணினேன்.

ஏட்டைப் பிரித்து அம்பர்ப் புராணத்தில் எழுதப் பெற்றிருந்த இறுதிச் செய்யுளை வாசிக்கச் சொன்னார். பிறகு சிறிது நேரம் ஏதோ யோசித்தார். அப்பால் புதிய பாடல்களைச் சொல்ல ஆரம்பித்தார். “பெரிய ஆச்சரியமாக அல்லவா இருக்கிறது இது? வண்டியிலே பிரயாணம் செய்கிறோம். இப்போது மனம் ஓடுமா? கற்பனை எழுமா? கவிகள் தோன்றுமா? அப்படித் தோன்றினாலும் நாலைந்து பாடல்களுக்கு மேற் சொல்ல முடியுமா?” என்று பலவாறு நான் எண்ணமிடலானேன். 

அவர் மனப் பாடம் பண்ணிய பாடல்களை ஒப்பிப்பது போலத் தடையின்றி ஒவ்வொரு செய்யுளாகச் சொல்லி வந்தார். வண்டிமெல்லச் சென்றது. அவருடைய கவிதை வெள்ளமும் ஆறு போல வந்துகொண்டிருந்தது. என் கையும் எழுத்தாணியை ஓட்டிச் சென்றது. வண்டியின் ஆட்டத்தில் எழுத்துக்கள் மாறியும் வரிகள் கோணியும் அமைந்தன. அவர் சொன்ன
செய்யுட்களோ திருத்தமாகவும் பொருட் சிறப்புடையனவாகவும் இருந்தன."

இந்தத் தலபுராணம் ஒரு சிவஸ்தலத்தின் சிறப்பை மட்டும் விளக்குவதன்று. தான் பார்த்து வழிபட்ட பல சிவஸ்தலங்களின் அருமை பெருமைகளை உட்புகுத்தி இதனை ஒரு சிவஸ்தலக் கருவூலமாக தனது செய்யுள்களின் வழியாக பிள்ளையவர்க்ள் உருவாக்கித் தந்திருக்கின்றரகள். வட இந்தியாவிலிருந்து நந்தன் எனும் ஒரு அரசன் திருஅம்பர் சிவஸ்தலத்தில் வழிபட்டுச் செல்ல வந்து போகும் போது வழியில் தான் காணும் சிவஸ்தலங்களையெல்லாம் தரிசித்து அவற்றைப் பற்றி கூறுவது போல அமைந்தது இந்தப் புராணம்.தனது அனுபவத்தில் தனது தேடலில் தான் சேகரித்து வைத்திருக்கும் விஷயங்களை ஒரு கதாபாத்திரத்தின் வாயிலாக வெளிப்படுத்தும் வகையில் சிவாலயங்களின் பெருமைகளை தலபுராணம் என்னும் வடிவில் உருவாக்கியிருக்கின்றார் பிள்ளையவர்கள்.

உ.வே.சா தனது வியப்பை மேலும் இப்படிக் குறிப்பிடுகின்றார்.

"வண்டியிலே போவதை நாங்கள் மறந்தோம். தம் கற்பனா உலகத்தில் அவர் சஞ்சாரம் செய்தார். அங்கிருந்து ஒவ்வொரு செய்யுளாக உதிர்த்தார். அவற்றை நான் எழுதினேன். எனக்கு அவருடைய உருவமும் அவர் கூறிய செய்யுட்களுமே தெரிந்தன. வேறொன்றும் தெரியவில்லை. ஒரு பாட்டை அவர் சொல்லி நிறுத்தியவுடன் சில சில சமயங்களில் அந்த அற்புத நிகழ்ச்சிக்குப் புறம்பாக நின்று நான் சில நேரம் பிரமிப்பை அடைவேன். ஆனால் அடுத்த கணமே மற்றொரு செய்யுள் அவர் வாயிலிருந்து புறப்பட்டு விடும். மீண்டும் நான் அந்த நிகழ்ச்சியிலே கலந்து ஒன்றி விடுவேன். "

இப்படி பிரயாணத்தின் போதே திருஅம்பர்ப்புராணம் வளர திருவாவடுதுறை மடத்தின் வாயிலை வந்தடைந்து விடுகின்றனர்.

" “சரி, சுவடியைக் கட்டிவையும்; பின்பு பார்த்துக் கொள்ளலாம்” என்று ஆசிரியர் உத்தரவிட்டார். அவரை வாயாரப் பாராட்டிப் புகழும் நிலையும் அதற்கு வேண்டிய ஆற்றலும் இருக்குமாயின் அப்போது நான் ஒர் அத்தியாயம் சொல்லி என் ஆசிரியர் புகழை விரித்து என் உள்ளத்தே இருந்த உணர்ச்சி அவ்வளவையும் வெளிப்படுத்தியிருப்பேன். அந்த ஆற்றல் இல்லையே! " 

இப்படி ஒரு பயணத்தின் போது உருவாகிய  திருவாவடுதுறை மடத்தில் முற்றுப் பெற்ற இந்த நூலை திருவாவடுதுறை மடத்திலேயே நேராகப் பெற்று மின்னாக்கம் செய்த போது என் உள்ளம் அளவில்லா மகிழ்ச்சியில் நிறைந்தது. இந்த இரண்டு பெரியோர்களின் சிந்தனை என்னை முழுமையாக ஆக்கிரமித்திருக்க இந்த நூலை மின்னாக்கம் செய்து முடித்தேன், தமிழ் மரபு அறக்கட்டளையின்  மின்னூல்கள் வரிசையில் இடம் பெறும் இந்த நூலின் உள்ளடக்கம் மட்டுமன்றி இந்த நூல் உருவான வரலாறும் கூட வித்தியாசமானது தான். அதனை உணர்ந்து வாசிக்கும் போது ஒரு பரவசம் மனதில் ஏற்படத்தான் செய்கின்றது.

திருஅம்பர் புராணம் நூலை வாசிக்க இங்கே செல்க!


தொடரும்..

சுபா

Sunday, May 19, 2013

Robert Langdon is back..! -1


http://www.npr.org/2013/05/18/183902954/dan-brown-inferno-is-the-book-that-i-would-want-to-read

டான் ப்ரவ்னின் புதிய நூல் Inferno வெளிவந்து விட்டது. டான் ப்ரவுன் நூல் விசிறிகளுக்கு இது மேலும் ஒரு பெரிய பரிசாக அமையும்.. டா வின்சி கோட் தொடங்கி ஹார்வெர்ட் பல்கலைக்கழக பேராசிரியர் ரோபெர்ட் லாங்டன் மேற்கொள்ளும் ஒவ்வொரு பயணமும் ஆய்வுகளும் தேடல்களும்  பயங்கர அனுபவங்களும் அவை அனைத்தும் தொடர்பு கொண்டுள்ளதாய் அமையும் சமய பின்புலங்களும் இந்த நாவல்களின் மையமாக அமைந்திருக்கும்.

இம்முறை வெளிவந்திருக்கும்  Inferno - 14ம் நூ இலக்கியவாதி Dante கவிதைகளை மையமாகக் கொண்டுள்ளதாகவும் அதற்காக இத்தாலியின் ப்ளோரன்ஸ் மானிலத்தில் பல மாதங்கள் ஆய்விற்கு செலவிட்டு இந்த நூலை எழுதியிருப்பதாகவும் தெரிகின்றது.  ப்ளோரன்ஸ் ஒரு மிஸ்டிக்கல் நகரம். இவ்வாண்டு 4 நாட்களை அங்கு நான் செலவு  செய்தேன். 11 - 15ம் நூற்றாண்டு வரை இத்தாலிக்கு மட்டுமல்லாது ஐரோப்பிய கத்தோலிக்க மதப்பரப்பலுக்கு மையமாக திகழ்ந்த நகரம் இது. இன்றும் இதன் சிறப்பு ஈடு செய்ய முடியாதது.

நூலைப் பற்றிய மேல் தகவல்களுக்கு...
http://www.danbrownofficial.co.uk/?gclid=CMTexOW2orcCFerHtAodK3wA3A டான் ப்ரவ்னின் அதிகாரப்பூர்வ இணைய பக்கங்களில் ஒன்று.

ஒரு நூலை நேற்று அமேஸோன் பக்கத்தில் வாங்கியிருக்கின்றேன்.


சுபா

Saturday, May 18, 2013

மனம் எந்த விதமான நிலையிலிருந்தாலும் மலர்களைப் பார்க்கும் போது புத்துணர்ச்சி தோன்றும்.

இன்று சிலருக்கு பிறந்த நாளாக இருக்கலாம். சிலருக்குப் பொழுது மிக மனம் நிறைந்து  மகிழ்ச்சியைத் தருவதாக அமைந்திருக்கலாம்.சிலருக்கு ஏமாற்றம் தரும் வகையில் இருந்திருக்கலாம், சிலருக்கு கவலையும் வேதனையும் தோல்வியும் கூட அமைந்திருக்கலாம்.

எல்லாருக்கும் இன்றைய நாள் இனிய நாளாக அமைய எனது தோட்டத்து டூலிப் மலர்களை இங்கே தருகின்றேன்.









டூலிப்களில் பல விதங்களைச் சோதனை செய்ய நினைத்து சென்ற ஆண்டு நட்டு வைத்த முயற்சியின் பலனாக அமைப்பிலும் வர்ணத்திலும், வடிவத்திலும் வெவ்வேறு வகையான மலர்கள் தோட்டத்தில்  இப்போது மலர்ந்து எழில் கொடுத்துக் கொண்டிருக்கின்றன.

சுபா